Abhishek Sharma: ఐపీఎల్ చరిత్రలో ఓపెనింగ్ జోడీగా పేరుగాంచిన ‘ట్రావిషెక్’ ప్రయాణానికి ముగింపు పలికింది. అంతర్జాతీయ క్రికెట్ షెడ్యూల్కు ప్రాధాన్యత ఇవ్వడంతో పాటు కుటుంబానికి సమయం కేటాయించాలనే ఉద్దేశంతో ఐపీఎల్ 2027 సీజన్ నుంచి తప్పుకోవాలని ఆస్ట్రేలియా స్టార్ బ్యాటర్ ట్రావిస్ హెడ్ నిర్ణయించుకున్నాడు. ఈ క్రమంలో సన్రైజర్స్ హైదరాబాద్ (SRH) ఫ్రాంచైజీ వచ్చే సీజన్ కోసం అతడిని రిటైన్ చేసుకోకుండా విడుదల చేసింది.
తన ఓపెనింగ్ భాగస్వామి జట్టును వీడటంపై భారత యువ సంచలనం అభిషేక్ శర్మ భావోద్వేగంగా స్పందించాడు. మైదానంలో హెడ్తో కలిసి పంచుకున్న మధుర క్షణాలను గుర్తుచేసుకుంటూ ఇన్స్టాగ్రామ్ వేదికగా కృతజ్ఞతలు తెలిపాడు. “అన్నింటికీ థాంక్యూ హెడీ” అంటూ ఆత్మీయ సందేశాన్ని పంచుకున్నాడు. ట్రావిస్ హెడ్ అండతో అభిషేక్ తన బ్యాటింగ్ శైలిని మరింత మెరుగుపరుచుకుని, లీగ్లోనే అత్యంత ప్రమాదకరమైన ఓపెనర్గా ఎదిగిన సంగతి తెలిసిందే.
సన్రైజర్స్ హైదరాబాద్ తరఫున 43 మ్యాచ్లు ఆడిన హెడ్, 176.14 భారీ స్ట్రైక్ రేట్తో 1,351 పరుగులు సాధించాడు. ఇక హెడ్, అభిషేక్ కలిసి 42 ఇన్నింగ్స్లలో 46.14 సగటుతో ఏకంగా 1,892 పరుగుల భాగస్వామ్యాన్ని నెలకొల్పారు. ఇందులో ఆరు సెంచరీ భాగస్వామ్యాలు, తొమ్మిది హాఫ్ సెంచరీ పార్టనర్షిప్లు ఉన్నాయి. ఎస్ఆర్హెచ్ చరిత్రలో ధావన్-వార్నర్ తర్వాత అత్యధిక పరుగులు చేసిన ఓపెనింగ్ జంటగా వీరు నిలిచారు. అంతేకాకుండా, ఐపీఎల్లో 1,000 కంటే ఎక్కువ పరుగులు సాధించిన జోడీలలో ఓవర్కు 12.46 రన్ రేట్తో పరుగులు రాబట్టి సరికొత్త రికార్డు సృష్టించారు.
కుటుంబానికి సమయం కేటాయించడంతో పాటు కెరీర్ పరంగా ఈ నిర్ణయం తీసుకున్నట్లు హెడ్ వెల్లడించాడు. సన్రైజర్స్తో గడిపిన మూడేళ్ల ప్రయాణం ఎప్పటికీ గుర్తుండిపోతుందని, జట్టుతో కలిసి సాధించిన విజయాలపై ఎంతో గర్వంగా ఉందని పేర్కొన్నాడు. హెడ్ నిష్క్రమణతో, డిసెంబర్ 16న జరిగే ఐపీఎల్ 2027 వేలంలో అభిషేక్ శర్మకు తోడుగా సరైన ఓపెనర్ను వెతకడం సన్రైజర్స్ యాజమాన్యానికి పెద్ద సవాలుగా మారనుంది.