Rohit Sharma: భారత క్రికెట్ దిగ్గజం, చెన్నై సూపర్ కింగ్స్ (CSK) మాజీ సారథి మహేంద్ర సింగ్ ధోనీ ఆటగాడిగా ఇండియన్ ప్రీమియర్ లీగ్ (ఐపీఎల్)కు వీడ్కోలు పలికారు. అయితే, ప్లేయర్గా మైదానాన్ని వీడినప్పటికీ, చెన్నై ఫ్రాంచైజీతో ఆయన అనుబంధం మరో రూపంలో కొనసాగనుంది. 2027 ఐపీఎల్ సీజన్ నుంచి సీఎస్కే ‘టీమ్ మెంటార్’గా ధోనీ సరికొత్త బాధ్యతలు చేపట్టనున్నారు. ఐపీఎల్ రిటెన్షన్ ప్రక్రియకు ముందు తనను ప్లేయర్ కాంట్రాక్ట్ నుంచి విడుదల చేయాలని ధోనీ స్వయంగా కోరడంతో, ఫ్రాంచైజీ యాజమాన్యం ఈ కీలక నిర్ణయం తీసుకుంది.

Rohit Sharma: మధుర జ్ఞాపకాలు ఎప్పటికీ గుర్తుండిపోతాయి!
ఐపీఎల్కు ఆటగాడిగా ధోనీ గుడ్బై చెప్పడంపై భారత స్టార్ క్రికెటర్ రోహిత్ శర్మ సోషల్ మీడియా వేదికగా భావోద్వేగంగా స్పందించారు. ధోనీతో తనకున్న అనుబంధాన్ని గుర్తుచేసుకుంటూ శుభాకాంక్షలు తెలిపారు. ‘‘అద్భుతమైన ఐపీఎల్ ప్రయాణం సాగించిన ధోనీ భాయ్కి హృదయపూర్వక అభినందనలు. నీతో కలిసి మైదానంలో, వెలుపల పంచుకున్న మధుర జ్ఞాపకాలు ఎప్పటికీ గుర్తుండిపోతాయి. నీపై ఉండే గౌరవం ఎప్పటికీ తగ్గదు’’ అంటూ రోహిత్ శర్మ ఆత్మీయ సందేశాన్ని పంచుకున్నారు.
మరోవైపు, ధోనీ కొత్త బాధ్యతలపై సీఎస్కే అధినేత ఎన్. శ్రీనివాసన్ స్పందిస్తూ.. ధోనీ లేని చెన్నై సూపర్ కింగ్స్ను తాము ఊహించలేమని, సీఎస్కే ఎప్పటికీ ఆయన సొంత ఇల్లేనని స్పష్టం చేశారు. జట్టు ప్రస్తుతం పరివర్తన దశలో ఉన్న తరుణంలో, భవిష్యత్ తరం ఆటగాళ్లను తీర్చిదిద్దేందుకు ధోనీ అపార అనుభవం, వ్యూహాలు జట్టుకు ఎంతగానో ఉపయోగపడతాయని సీఎస్కే సహ యజమాని రూపా గురునాథ్ పేర్కొన్నారు.