MS Dhoni Retirement: టీమిండియా మాజీ కెప్టెన్ మహేంద్ర సింగ్ ధోనీ ఐపీఎల్ ఆటగాడిగా తన సుదీర్ఘ ప్రయాణానికి ముగింపు పలికారు. 2008లో ప్రారంభమైన ఆయన ఐపీఎల్ ప్రస్థానం 19 ఏళ్ల తర్వాత ముగిసింది. ఈ నేపథ్యంలో ధోనీ భార్య సాక్షి సోషల్ మీడియాలో భావోద్వేగ పోస్ట్ పెట్టారు. మాహీ కొత్త ప్రయాణం ప్రారంభించబోతున్న సందర్భంగా ఆయనపై తనకున్న గర్వాన్ని వ్యక్తం చేశారు.
కొన్ని అధ్యాయాలు ముగియాల్సిందే.. సాక్షి భావోద్వేగ పోస్ట్

సాక్షి ధోనీ తన ఇన్స్టాగ్రామ్లో మాహీ ఫొటోను షేర్ చేస్తూ.. జీవితంలో అందమైన కొత్త అధ్యాయాలు ప్రారంభం కావాలంటే కొన్ని పాత అధ్యాయాలు ముగియాల్సిందేనని పేర్కొన్నారు. ఇన్నేళ్లుగా మాహీని ప్రేమించి, మద్దతుగా నిలిచి, ఆయనపై నమ్మకం ఉంచిన అభిమానులందరికీ హృదయపూర్వక ధన్యవాదాలు తెలిపారు. అభిమానులు చూపించిన ప్రేమకు ఎప్పటికీ రుణపడి ఉంటామని చెప్పారు. కొత్త ఆరంభాలు, సరికొత్త సాహసాలు, మరెన్నో అందమైన జ్ఞాపకాలకు స్వాగతం పలుకుతూ.. మాహీని చూస్తుంటే ఎంతో గర్వంగా ఉందని తన సందేశంలో పేర్కొన్నారు. ఈ పోస్ట్ ప్రస్తుతం సోషల్ మీడియాలో వైరల్ అవుతోంది.
MS Dhoni Retirement: ఆటగాడిగా ముగింపు.. సీఎస్కేలో కొత్త బాధ్యత
ధోనీ ఐపీఎల్లో ఆటగాడిగా కొనసాగబోరని చెన్నై సూపర్ కింగ్స్ (CSK) ప్రకటించింది. అయితే ఆయన జట్టుతో తన అనుబంధాన్ని కొనసాగించనున్నారు. ఐపీఎల్ 2027 నుంచి సీఎస్కే టీమ్ మెంటార్గా కొత్త బాధ్యతలు చేపట్టనున్నారు. 2008లో ఐపీఎల్ ప్రారంభమైనప్పటి నుంచి ధోనీ ఈ లీగ్లో కీలక ఆటగాడిగా నిలిచారు. ఆయన కెప్టెన్సీలో చెన్నై సూపర్ కింగ్స్ ఐదుసార్లు ఐపీఎల్ టైటిల్ను గెలుచుకుంది. ఆటగాడిగా మైదానంలో ఎన్నో చిరస్మరణీయ విజయాలను అందించిన మాహీ.. ఇకపై తన అనుభవంతో యువ ఆటగాళ్లకు మార్గనిర్దేశం చేయనున్నారు. ధోనీ ఆటగాడిగా ఐపీఎల్కు వీడ్కోలు పలకడంతో అభిమానులు భావోద్వేగానికి గురవుతున్నారు. మరోవైపు సాక్షి పెట్టిన పోస్ట్ మాహీ అభిమానులను మరింత ఎమోషనల్ చేస్తోంది.