Sarfaraz Khan: టీమిండియా యువ బ్యాటర్ సర్ఫరాజ్ ఖాన్ తన క్రికెట్ కెరీర్లో ఎదుర్కొన్న అత్యంత కఠినమైన రోజులను గుర్తు చేసుకున్నాడు. డ్రెస్సింగ్ రూమ్లో జరిగిన విషయాలను బయటకు లీక్ చేశాడంటూ తనపై ఆరోపణలు వచ్చినప్పుడు తీవ్ర మానసిక వేదనకు గురైనట్లు వెల్లడించాడు. ఆ సమయంలో సన్నిహితులు సైతం ఫోన్లు ఎత్తలేదని, తన తండ్రి బాధపడటం, భార్య ఏడవటం చూసి మరింత కలత చెందానని చెప్పాడు. ఆ కష్టకాలంలో ప్రస్తుత టీమిండియా హెడ్ కోచ్ గౌతమ్ గంభీర్ తనకు అండగా నిలిచాడని వివరించాడు.
మాజీ క్రికెటర్ ఆకాశ్ చోప్రా నిర్వహిస్తున్న ‘బైఠ్ ఔర్ బోల్’ కార్యక్రమంలో పాల్గొన్న సర్ఫరాజ్.. తన క్రికెట్ ప్రయాణంలో ఎదురైన చేదు అనుభవాలను పంచుకున్నాడు. బోర్డర్-గవాస్కర్ ట్రోఫీ సమయంలో గాయపడటంతో నేషనల్ క్రికెట్ అకాడమీ (ఎన్సీఏ)లో కోలుకుంటున్నానని తెలిపాడు. ఆ సమయంలోనే డ్రెస్సింగ్ రూమ్ విషయాలను బయటకు చేరవేస్తున్నాడంటూ తనపై వార్తలు వచ్చాయని చెప్పాడు. విమానం దిగి బయటకు రాగానే ఫోన్లు, మెసేజ్లు రావడం మొదలైందని, సోషల్ మీడియాలోనూ ఈ ఆరోపణలు విస్తృతంగా ప్రచారంలోకి వచ్చాయని గుర్తు చేసుకున్నాడు.
అసలు అలాంటి పని ఎందుకు చేస్తాను?

తనపై వచ్చిన ఆరోపణలు ఎంతో బాధించాయని సర్ఫరాజ్ తెలిపాడు. తాను నిజంగానే అలాంటి పని చేసి ఉంటే మళ్లీ ఇండియా-ఏ జట్టుకు ఎలా ఎంపికయ్యేవాడినని ప్రశ్నించాడు. ఇటీవల శ్రీలంక పర్యటనకు కూడా వెళ్లానని గుర్తు చేశాడు. అసలు ఈ వార్తలు ఎలా వచ్చాయో ఇప్పటికీ అర్థం కావడం లేదని అన్నాడు. ఆ సమయంలో ఎవరితో మాట్లాడాలో తెలియని పరిస్థితి ఎదురైందని వివరించాడు.
సన్నిహితులు కూడా ఫోన్లు ఎత్తలేదు
ఈ వివాదం తనకంటే కుటుంబ సభ్యులనే ఎక్కువగా బాధించిందని సర్ఫరాజ్ భావోద్వేగానికి గురయ్యాడు. జీవితంలో ఎన్నో కష్టాలను ఎదుర్కొన్నానని, వాటిని భరించే శక్తి తనకు ఉందని చెప్పాడు. అయితే తన తండ్రి బాధపడటం, భార్య ఏడవటం చూసి తట్టుకోలేకపోయానని తెలిపాడు. తల్లి, సోదరుడు కూడా ఆ సమయంలో తీవ్రంగా ఇబ్బంది పడ్డారని వెల్లడించాడు. తనకు దగ్గరగా ఉన్నవారు సైతం కనీసం ఫోన్ చేసి మాట్లాడలేదని ఆవేదన వ్యక్తం చేశాడు. సోషల్ మీడియాలో చిన్న విషయం బయటకు వచ్చినా అది క్షణాల్లో పెద్ద వివాదంగా మారిపోతుందని పేర్కొన్నాడు.
రెండు రోజుల తర్వాత గంభీర్ నుంచి ఫోన్
ఆ కష్టకాలంలో తనకు మొదటగా ఫోన్ చేసిన వ్యక్తి గౌతమ్ గంభీర్ అని సర్ఫరాజ్ వెల్లడించాడు. ఆరోపణలు వచ్చిన రెండు రోజుల తర్వాత గంభీర్ తనతో మాట్లాడారని తెలిపాడు. ఆటపై దృష్టి పెట్టాలని, ఇలాంటి విషయాలను పట్టించుకోవద్దని సూచించినట్లు చెప్పాడు. క్రికెట్లో ఇలాంటి రాజకీయాలు ఉంటాయని ధైర్యం చెప్పినట్లు గుర్తు చేసుకున్నాడు. తన తండ్రి బాధపడుతున్నారని, భార్య ఏడుస్తోందని గంభీర్కు చెప్పడంతో ఆయన తన తండ్రితో కూడా నేరుగా మాట్లాడారని సర్ఫరాజ్ తెలిపాడు. సర్ఫరాజ్ మంచి క్రికెటర్ అని, అతడిని ప్రశాంతంగా క్రికెట్ ఆడనివ్వాలని కుటుంబ సభ్యులకు భరోసా ఇచ్చినట్లు వివరించాడు. ఆ సమయంలో గంభీర్ ఇచ్చిన ధైర్యం తనకు ఎంతో అండగా నిలిచిందని సర్ఫరాజ్ చెప్పుకొచ్చాడు.