Magnus Carlsen: ప్రపంచ చెస్ దిగ్గజం, నార్వే గ్రాండ్మాస్టర్ మాగ్నస్ కార్ల్సన్ మరోసారి తన వ్యవహారశైలితో వివాదాలకు కేంద్రబిందువయ్యారు. ప్రతిష్ఠాత్మక ‘టోటల్ చెస్ వరల్డ్ ఛాంపియన్షిప్ టూర్ పైలట్’ టోర్నీలో కజకిస్థాన్ క్రీడాకారిణి బిబిసారా అసౌబాయేవాతో జరగాల్సిన ఫాస్ట్ క్లాసిక్ పోటీల నుంచి కార్ల్సన్ అర్ధంతరంగా వైదొలగడం చెస్ ప్రపంచంలో పెను దుమారం రేపుతోంది.
అసలేం జరిగింది?
ఈ టోర్నీ నాకౌట్ (క్లాసిఫికేషన్) దశలో భాగంగా మంగళ, బుధవారాల్లో బిబిసారా అసౌబాయేవాతో జరిగిన పోటీల్లో బ్లిట్జ్, ర్యాపిడ్ గేమ్లలో ఆధిక్యం సాధించిన అనంతరం, చివరగా జరగాల్సిన ‘ఫాస్ట్ క్లాసిక్’ గేమ్ ఆడకుండానే కార్ల్సన్ నిష్క్రమించారు.
అయితే, ఆట నుంచి తప్పుకుంటున్న విషయాన్ని ప్రత్యర్థి బిబిసారాకు కనీసం మాటమాత్రంగానైనా చెప్పకుండానే ఆయన హాల్ నుంచి వెళ్లిపోయారు. మరోవైపు కార్ల్సన్ వస్తారని బిబిసారా బోర్డు వద్దే వేచి చూస్తూ ఉండిపోవడం గమనార్హం. తాను వెళ్తున్నట్లు ఆర్బిటర్కు సమాచారం ఇచ్చినప్పటికీ, ఆ విషయం ప్రత్యర్థికి చేరకపోవడంతో తీవ్ర విమర్శలు తలెత్తాయి.

15 ఏళ్ల నంబర్ వన్ ర్యాంక్కు ముప్పు?
ఈ వివాదం వెనుక కార్ల్సన్ ర్యాంకింగ్ భయం దాగి ఉందన్న చర్చ జోరుగా సాగుతోంది.అంతకుముందు గ్రూప్ స్టేజ్లో కార్ల్సన్ తీవ్రంగా నిరాశపరిచారు. ఆడిన 10 గేముల్లో ఒక్క విజయం కూడా సాధించలేకపోయారు (9 డ్రాలు, ఒక ఓటమి).గ్రూప్లో ఐదో స్థానంతో సరిపెట్టుకున్న ఆయన, ఏకంగా 21.8 రేటింగ్ పాయింట్లను కోల్పోయారు. దాదాపు 17 ఏళ్లుగా కాపాడుకుంటున్న 2800 ఎలో (Elo) రేటింగ్తో పాటు, 15 ఏళ్లుగా తన వద్దే ఉన్న ప్రపంచ నంబర్ వన్ ర్యాంక్ చేజారుతుందేమోనని అభిమానుల్లో ఆందోళన మొదలైంది.
ఒకవేళ బిబిసారాతో ఫాస్ట్ క్లాసిక్ గేమ్ ఆడి డ్రా చేసుకున్నా లేదా ఓడిపోయినా ఆయన రేటింగ్ మరింత పడిపోయే ప్రమాదం ఉండటంతోనే కావాలని వాకౌట్ చేశారన్న ఆరోపణలు వినిపిస్తున్నాయి. అయితే, ఇది పైలట్ టోర్నీ కావడంతో, ఫోర్ఫీట్ (ఆడకుండా వదిలేసిన) గేమ్ల ప్రభావం రేటింగ్పై పడకపోవడంతో కార్ల్సన్ నంబర్ వన్ ర్యాంక్కు తక్షణ ముప్పు తప్పింది.చెస్ వర్గాల తీవ్ర ఆగ్రహంఅర్థం లేని గేమ్లు ఆడటం ఇష్టం లేదంటూ కార్ల్సన్ సమర్థించుకున్నప్పటికీ, ఆయన తీరుపై మరియు టోర్నీ నిర్వాహకులు ఆయనకు చూపుతున్న ప్రత్యేక ప్రాధాన్యతపై పలువురు క్రీడాకారులు మండిపడుతున్నారు.
“రేటింగ్ కంటే ముందే హుందాతనం, మర్యాద పతనమయ్యాయి”— శ్రీనాథ్ నారాయణన్ (భారత ఒలింపియాడ్ చెస్ కెప్టెన్)ఆటగాళ్లందరికీ నిబంధనలు సమానంగా ఉండాలని, ఒకే ఆటగాడికి పదేపదే వెసులుబాటు ఆటగాళ్లందరికీ నిబంధనలు సమానంగా ఉండాలని, ఒకే ఆటగాడికి పదేపదే వెసులుబాటు కల్పించడం సరికాదని అమెరికా గ్రాండ్మాస్టర్ హన్స్ నీమన్ సహా పలువురు విమర్శలు గుప్పించారు.