Khelo India Youth Games 2026: కేంద్ర ప్రభుత్వం ప్రతిష్టాత్మకంగా నిర్వహించే ‘ఖేలో ఇండియా యూత్ గేమ్స్ – 2026’ ఎనిమిదో ఎడిషన్కు తెలంగాణలో వేదికలు ఖరారయ్యాయి. డిసెంబరు 11 నుండి 22వ తేదీ వరకు జరగనున్న ఈ క్రీడా మహోత్సవం కోసం రాష్ట్ర ప్రభుత్వం మొత్తం 20 వేదికలు, 27 క్రీడాంశాలను ఫైనల్ చేసింది. ఈ మెగా ఈవెంట్ను అంతర్జాతీయ ప్రమాణాలతో నిర్వహించేందుకు ప్రభుత్వం దాదాపు రూ. 220 కోట్లు ఖర్చు చేస్తోంది.

Khelo India Youth Games 2026: హైదరాబాద్ సహా ఐదు జిల్లాల్లో వేదికల ఎంపిక
క్రీడా పోటీల నిర్వహణ కోసం హైదరాబాద్తో పాటు హన్మకొండ, ఖమ్మం, నిజామాబాద్, మహబూబ్ నగర్, కరీంనగర్ జిల్లాల్లో వేదికలను ఖరారు చేశారు. ముఖ్యంగా హైదరాబాద్ నగరంలోని గచ్చిబౌలి స్టేడియం, ఉస్మానియా యూనివర్సిటీ (OU), కోట్ల విజయభాస్కర్ రెడ్డి ఇండోర్ స్టేడియం, పీజేఆర్ స్టేడియం, ఆరాస్కి వంటి ప్రముఖ క్రీడా ప్రాంగణాల్లో పోటీలు నిర్వహించేందుకు ప్రభుత్వం రంగం సిద్ధం చేసింది. ఈ ఎనిమిదో ఎడిషన్లో దేశవ్యాప్తంగా 2,400 మందికి పైగా అథ్లెట్లు పాల్గొననున్నారు.
డిసెంబరులో జరగనున్న ‘ఖేలో ఇండియా యూత్ గేమ్స్ – 2026’ ప్రారంభ, ముగింపు వేడుకలకు ముఖ్య అతిథిగా హాజరుకావాలని భారత ప్రధాని నరేంద్ర మోదీని తెలంగాణ ముఖ్యమంత్రి రేవంత్ రెడ్డి ఇటీవల ఆహ్వానించారు. ఈ సందర్భంగా ప్రధానికి ఆహ్వాన పత్రికను అందించడంతో పాటు యూత్ గేమ్స్ అధికారిక లోగో, మస్కట్ల విశేషాలను సీఎం వివరించారు.
యువ క్రీడాకారులకు గొప్ప వేదిక.. సీఎం రేవంత్
భవిష్యత్తులో ఆసియా క్రీడలు, ఒలింపిక్స్ వంటి ప్రతిష్ఠాత్మక అంతర్జాతీయ పోటీల్లో భారత్ తరఫున ప్రాతినిధ్యం వహించేందుకు యువ క్రీడాకారులకు ఖేలో ఇండియా ఒక చక్కని వేదిక కానుందని సీఎం రేవంత్ రెడ్డి పేర్కొన్నారు. గతంలో 2002లో జాతీయ క్రీడలు, 2007లో ప్రపంచ మిలిటరీ క్రీడలను అత్యంత విజయవంతంగా నిర్వహించిన ఘన చరిత్ర తెలంగాణకు ఉందని ఆయన గుర్తుచేశారు.